Кинеската авиокомпанија „Ер Чајна“, единствената странска авиокомпанија што извршува редовни комерцијални летови кон Северна Кореја, ќе ги откаже од понеделник летовите на релација Пекинг-Пјонгјанг, објави кинеската телевизија.
Кинеските медиуми не дадоа образложение за укинување на летовите.
Кинеската „Ер Чајна“ и севернокорејската „Ер Корјо“ се единствени две авиокомпании што вршат летови на таа релација.
Најавата следува откако армијата на Северна Кореја се закани денеска со „немилосрден одговор“ на каква било провокација од САД.
Претходно, американската телевизија Ен-Би-Си, повикувајќи се на американски разузнавачки извори, јави дека САД се подготвени да извршат превентивен напад со неконвенционално оружје врз Северна Кореја доколку биде извршена уште една нуклеарна проба.