Акциите на НАТО, кои сега планираат да ги прошири своите пипала во Азија, претставуваат закана за стабилноста на светот и регионот, изјави портпаролот на кинеското Министерство за надворешни работи, Лин Џијан.
Тој посочи дека таканаречената безбедност на Алијансата е вистински извор на ризици кои го загрозуваат глобалниот мир и стабилност.
– Како наследство од Студената војна и најголемиот воен сојуз во светот, НАТО тврди дека е одбранбен сојуз, а во исто време продолжува да ги пробива границите, да го проширува својот мандат, да излегува надвор од својата одбранбена зона и да предизвикува конфликти, рече Лин.
Тој истакна дека Кина силно се спротивставува на обвинувањата на Алијансата против Пекинг, како и на употребата на Кина од страна на НАТО како изговор за проширување на исток во азиско-пацифичкиот регион и за раздвижување на работите таму. Според него, Пекинг го повикува НАТО да се откаже од менталитетот на Студената војна и да престане да создава имагинарни непријатели насекаде.
Денеска во Вашингтон започнува тридневниот самит на НАТО, по повод 75-годишнината од постоењето на тој воен сојуз, а главна тема на состанокот ќе биде потврда на непоколебливата поддршка за Украина.
Сојузниците, исто така, ќе разговараат за зајакнување на одвраќањето и одбраната, зголемување на военото производство и индустриската база, подобрување на партнерствата во Алијансата и инвестирање во сопствената и колективната одбрана на членките на НАТО.