Кина ги зголеми одмаздничките царини за американскиот увоз од 84 на 125 отсто, соопшти Царинската комисија на Државниот совет.
Кинескиот претседател Си Џинпинг денеска во Пекинг се сретна со шпанскиот премиер Педро Санчез и порача дека земјата не се плаши од трговска војна со САД.
– Не се плашиме. Во трговската војна нема победници, а одењето против светот само ќе доведе до самоизолација. Кина 70 години се потпира исклучиво на вредните луѓе, а ние ќе останеме фокусирани на управувањето со нашите работи без оглед на околностите, рече Си во Пекинг.
Си ја искористи средбата со Санчез за да испрати јасна политичка порака до Европската Унија. Кинескиот претседател го повика Брисел да работи со Пекинг за да се спротивстави на, како што рече, „едностраното малтретирање“, очигледно повикување на високите царини наметнати од американскиот претседател Доналд Трамп за кинески стоки.
Претседателот Си Џинпинг ја повика Европската Унија да застане со Кина за да се спротивстави на едностраното малтретирање, објавија утринава кинеските државни медиуми.