Украинските сили за специјални операции тврдат во соопштение дека нападот врз седиштето на руската Црноморска флота во Севастопол резултирал со десетици мртви и ранети.
Високото раководство на флотата е меѓу жртвите, пренесува CNN.
Во соопштението на Телеграм, се наведува дека специјалната операција наречена „Стапица за ракови“, која била спроведена во петокот, била темпирана во моментот кога се состанувале високи офицери на руската морнарица и дека нејзиниот резултат бил десетици мртви и ранети, „вклучувајќи го и високото раководство на флотата“.
„Храбрата и макотрпна работа на силите за специјални операции овозможи навреме и прецизно да се таргетира штабот на Црноморската флота, додека повисокиот штаб на руската морнарица се состануваше во привремено окупираниот град Севастопол“, се вели во соопштението.
Се додава дека „деталите за нападот ќе бидат откриени што е можно поскоро“.
Украина засега нема дадено никакви дополнителни информации или докази за конкретни жртви меѓу припадниците на руската Црноморска флота, наведува Си-Ен-Ен.