Украина не може да ја гарантира безбедноста на тимот инспектори на ОН кои денеска пристигнаа во нуклеарната централа „Запорожје“, изјави украинскиот министер за енергетика Херман Халушченко.
Ситуацијата околу нуклеарната централа се уште е „хаотична“, изјави Халушченко за „Си-Ен-Ен“ во Новоалександривка, во регионот Запорожје, кој инаку ја придружуваше делегацијата на Меѓународната агенција за атомска енергија (МААЕ) која подоцна влезе на територијата што е под контрола на руските трупи.
Халушченко вели дека му рекол на генералниот директор на МААЕ Рафаел Гроси дека безбедноста на мисијата е „негова одговорност“, на што од Гроси добил уверување дека „може да го преземе тој ризик“.
„Украина ги исполни сите меѓународни обврски и дозволи мисијата да дојде“, рече министерот, додавајќи дека според неговото разбирање, мисијата на МААЕ „има некаков безбедносен договор со Русите“.
Извор: МИА