Високата претставничка на ЕУ за надворешни работи и безбедносна политика, Каја Калас, денес изјави дека секој план за ставање крај на војната во Украина ќе има потреба од поддршка од Киев и Брисел.
„Она што ние, како Европејци, отсекогаш сме го поддржувале е траен и праведен мир и ги поздравуваме сите напори за постигнување на тоа. Секако, за да функционира секој план, потребни се Украинците и Европејците“, изјави Калас пред новинарите по пристигнувањето на состанокот на министрите за надворешни работи на ЕУ во Брисел.
Според извештаите на американските медиуми, американскиот претседател Доналд Трамп оваа недела одобри план од 28 точки за мир меѓу Русија и Украина, кој високи претставници на администрацијата го развиваа во последните недели во консултација со рускиот претставник Кирил Дмитриев и украинските претставници.