Известувачот на Европскиот парламент за Србија Јелко Кацин рече денеска дека Србија би требало да го почитува договорот за сукцесија и укажа на примерот на Хрватска на која и се заканува блокада за зачленување во ЕУ поради непридржување на договорот со Словенија.
Кацин ја критикуваше иницијативата од Кабинетот на претседателот Томислав Николиќ да се преиспитаат договорите за сукцесија кои Србија ги потпишала со поранешните југословенски републики за распределба на имотот на некогашната сојузна држава.
– Прашањето на сукцесија е многу значаен договор на сите држави од поранешна Југославија, со што тие докажаа дека се посветени на намалување на тензиите и иднината, рече Кацин и истакна дека преиспитувањето на договорите би испратил спротивен сигнал.
– Договорот е тој магичен збор, рече Кацин и укажа дека не е добро дека во Србија, како парламентарна демократија различни институции имаат различни ставови за меѓународни договори.
Кацин во тој контекст го истакна примерот на Хрватска, чие зачленување во ЕУ Словенија се заканува да го блокира поради спорот поради штедните влогови на поранешната „Љубљанска банка“.
Тој предупреди дека невлегувањето на Хрватска во ЕУ поради тврдиот став на тамошните власти во спорот со Словенија би имало негативни последици по целиот регион на Западен Балкан и би испратил лоша порака на политичките лидери и народи кои се стремат кон придружување во ЕУ.