Израелскиот министер за одбрана Израел Кац денес одлучи да ја укине вонредната состојба на југот од земјата, која беше воведена по нападот на Хамас врз областа на 7 октомври 2023 година.
Наредбата за укинување на вонредната состојба ќе стапи на сила утре наутро, две години по нападот, објавува „Тајмс оф Израел“.
„Одлучив да ја усвојам препораката на израелската војска и да ја укинам, за прв пат од 7 октомври, вонредната состојба на домашниот фронт. Оваа одлука ја одразува новата безбедносна реалност на југот од земјата, која е постигната благодарение на решителните и силни акции на нашите херојски трупи против терористичката организација Хамас во текот на изминатите две години“, рече Кац.
Вонредната состојба беше воведена по нападот на Хамас врз целата територија на земјата, но остана на сила само на јужната територија, односно околу палестинската енклава Појасот Газа.
Во двете години од војната на Израел против Хамас во Појасот Газа, повеќе од 68.519 Палестинци беа убиени, а повеќе од 170.382 беа ранети.