Израелскиот министер за одбрана Израел Кац денеска најави дека земјата инсистира на правото да дејствува воено против Хезболах во секој договор за прекин на борбите во Либан.
Во изјавата, Кац наведе дека „услов за какво било политичко решение во Либан е зачувување на разузнавачките способности и зачувување на правото на израелската армија да дејствува и да ги штити граѓаните на Израел од Хезболах“, пренесува АП.
Претходно, лидерот на Хезболах Наим Касем најави дека преговорите продолжуваат, но дека не треба да му се дозволи на Израел да го наруши суверенитетот на Либан и да влезе во земјата и да „убива како сака“.
Касем истакна дека Хезболах ќе преговара и ќе се бори во исто време.
Тој исто така изјави дека прекинот на огнот зависи од одговорот на Израел и сериозноста на израелскиот премиер Бенјамин Нетанјаху.