Израелскиот министер за одбрана Израел Кац денес изјави дека го предупредил Либан дека доколку не ги спречи нападите на либанската милитантна група Хезболах, Израел ќе „ја преземе територијата и ќе го направи тоа сам“.
„Го предупредив либанскиот претседател (Џозеф Аун) дека доколку либанската влада не знае како да ја контролира територијата и да го спречи Хезболах да им се заканува на северните заедници и да пука кон Израел, ние ќе ја земеме територијата и ќе го направиме тоа сами“, рече Кац на состанокот со високи израелски воени офицери, објави „Тајмс оф Израел“.
Кац рече дека тој и израелскиот премиер Бенјамин Нетанјаху ѝ наредиле на израелската војска да се подготви за проширување на своите активности во Либан и враќање на мирот и безбедноста во заедниците во северен Израел.