Бројот на жртвите на веќе двегодишната граѓанска војна во Сирија изнесува најмалку 80.000 лица, и е за околу 20.000 лица повеќе од почетокот на годината, изјави денеска претседателот на Генералното собрание на ОН, Вук Јеремиќ, цитиран од британските медиуми.
Високиот комесар на ОН за правата на човекот Нави Пилај на 2 јануари изјави дека над 60.000 лица биле убиени за време на востанието против сирискиот претседател Башар ал-Асад.
Најмалку 80.000 лица загинале од почетокот на конфликтот, а како што се смета, поголемиот дел од овие жртви се цивили, изјави Јеремиќ пред 193-членото Генерално собрание пред гласањето на резолуција за сирискиот конфликт.
Опозициската организација Сириски центар за мониторинг на човековите права вчера соопшти дека најмалку 94.000 лица се убиени, но дека бројот на загинати веројатно е речиси 120.000 лица.