Јапонија денес ги оцени како „неосновани“ обвинувањата од Кина дека јапонските сили ги попречувале кинеските борбени авиони за време на воените маневри во Пацификот.
Портпаролот на јапонската влада, Минору Кихара, изјави на прес-конференција дека авионите на јапонското воено воздухопловство држеле „безбедна дистанца“ додека се наоѓале во близина на најјужната јапонска префектура Окинава, пренесува агенцијата Кјодо.
Тој нагласи дека комуникацијата и одржувањето канали за дијалог меѓу одбранбените власти на двете земји се од суштинско значење, и покрај тоа што Пекинг презеде мерки на одмазда поради минатомесечната изјава на Токио дека Јапонија би могла да се вклучи во случај на кинески напад врз Тајван.