Командантот на дивизијата Имам Хусеин, паравоена единица што дејствува во рамките на либанското милитантно движење Хезболах, Али Мусалам Табаја, беше убиен заедно со неговиот заменик и неколку високи команданти во израелски воздушен напад во Либан во текот на ноќта, соопшти денес израелската војска.
Началникот на Генералштабот на Израел, генерал-потполковник Ејал Замир изјави дека целта била единица на Иранската револуционерна гарда чија улога е да извршува напади врз Израел од Либан, објави „Тајмс оф Израел“.
„Ова е дивизија на Иранската револуционерна гарда чија мисија е да го нападне Израел од либанска територија. Со години се обидуваме да ги лоцираме и елиминираме. Синоќа, додека тие насочуваа оган кон Израел, тие беа елиминирани за неколку секунди“, рече Замир.