За само еден час, по прогласувањето на примирјето меѓу Израел и исламистичката група Хамас, од Појасот Газа врз Израел синоќа биле истрелани 12 ракети.
Според портпаролот на израелската полиција, ракетите паднале во ненаселени реони и не предизвикале жртви и штети. Армијата соопшти дека противракетната одбрана на Израел пресретнала неколку од истреланите ракети.
Очевидци раскажаа дека веднаш по стапувањето во сила на спогодбата за прекин на огнот во Газа имало една експлозија. Нема настрадани луѓе и не е позната причината за експлозијата.
Заради прогласеното примирје Советот за безбедност на ОН ја откажа за вчера попладне закажаната расправа за кризата во Газа. Место тоа, Советот на затворена седница преку видоконференциска врска го ислуша извештајот на генералниот секретар на ОН, Бан Ки-мун за кризата во Газа, по неговите средби со блискоисточните лидери, соопштија американските медиуми.
Советот за безбедност ги повика Израел и Хамас да го почитуваат примирјето и ги пофали напорите на египетскиот претседател Мохамед Морси за неговото склучување.