Израелскиот советник за национална безбедност Јаков Амидрор најави дека Израел нема да дозволи руските ракетни системи С-300 во Сирија да станат оперативни.
Амидрор, тоа го изјави, пред сирискиот претседател Башад ал Асад денеска да го потврди пристигнувањето на првата пратка ракетни системи С-300 од Русија.
Израелскиот советник за безбедност, ја соопштил ваквата „црвена линија“ на Израел во однос на руските ракетни системи на состанок со амбасадорите на земјите-членки на ЕУ во Ерусалим, објави денеска израелскиот весник „Хаарец“.
Министерот за одбрана на Израел Моше Јалон во вторникот изјави дека Израл знае што треба да прави ако ракетните системи С-300 стигнат до Сирија, изразувајќи надеж дека тоа нема да се случи.
На состанокот зад затворени врати е изнесено дека според проценките на Израел, Русија кога тогаш ќе ги достави ракетните системи на Сирија, но дека тоа нема ништо со Израел, тукусо руското ривалство со САД, Велика Британија и Франција во однос на сириското прашање.
Според анонимен израелски дипломат, Тел Авив смета дека испораката на ракетни системи не може да се спречи и затоа ќе дејствува против тоа, но пред тие да станат оперативни.