Израелската војска издаде предупредување до иранските граѓани кои живеат во близина на иранските воени објекти, велејќи дека „може да бидат цел“ ако останат во своите домови.
„Ве молиме веднаш да ги напуштите овие области за да ги заштитите вашите животи и безбедност. Не се враќајте во вашите домови до понатамошно известување“, се вели во соопштението на израелската армија.
Понатаму тие наведоа дека „присуството во овие области претставува ризик за нивниот живот“.
Како што може да се види во соопштението, израелската армија ги моли Иранците да ја напуштат областа каде што, како што тврдат, има фабрики за производство на оружје.
Нападите на Израел врз Иран продолжија во текот на ноќта, а целите беа гасните и нафтените полиња на земјата, како и цивилната инфраструктура во Техеран.
Од друга страна, Иран изврши ракетен напад врз Израел во два брана во текот на ноќта. Според локалните власти во Израел, најмалку седум лица беа убиени.