Кабинетот на израелскиот премиер Бенјамин Нетанјаху соопшти дека неговиот кабинет нема да се состане за да го одобри договорот за прекин на огнот во Појасот Газа и ослободувањето на десетици заложници додека Хамас не се откаже од она што го нарече „криза во последен момент“, пренесува АП.
Канцеларијата на Нетанјаху го обвини Хамас дека се повлекува од делови од договорот за да се обиде да „изнуди отстапки во последен момент“. Не беа дадени дополнителни детали. За потсетување, израелскиот кабинет денеска требаше да го ратификува договорот.
Американскиот претседател Џо Бајден и клучниот посредник Катар вчера го објавија договорот. Според него, 33 заложници ќе бидат ослободени во следните шест недели во замена за ослободување на стотици палестински затвореници и израелско повлекување од многу делови на територијата.
Во израелските напади низ Појасот Газа во изминатиот ден загинаа најмалку 48 лица. За време на претходните конфликти, двете страни ги интензивираа воените операции во последните часови пред да стапи на сила прекинот на огнот за да покажат сила.