Гвајана и Венецуела синоќа, по состанокот на шефовите на држави во Сент Винсент и Гренадини, се договорија да избегнат употреба на сила и да не ги ескалираат тензиите во долготрајниот спор околу регионот Есекибо богат со нафта. Површината од 160.000 квадратни километри генерално се смета за дел од Гвајана, но во последниве години, по големите откритија за нафта и гас, Венецуела ги оживеа своите претензии кон територијата и крајбрежните области.
Двете земји во заедничката изјава рекоа дека „нема да се закануваат или употребуваат сила една против друга под никакви околности“ и „ќе се воздржат, со збор или дело, од ескалација на каков било конфликт или несогласување“.
Тензиите нагло се зголемија овој месец откако гласачите на референдумот во Венецуела го поддржаа потегот регионот Есекибо да се направи нова венецуелска држава и ја отфрлија надлежноста на Меѓународниот суд на правдата (МСП), кој го води случајот меѓу двете земји.
Спорот дополнително се разгоре откако венецуелскиот претседател Николас Мадуро минатата недела изјави дека ќе одобри истражување на нафта во регионот Есекибо.
Претседателот на Гвајана Ирфан Али и Мадуро се сретнаа во четвртокот на аеродромот Кингстаун, заедно со претставници на Карипската политичка и економска унија CARICOM, Бразил, Обединетите нации и Заедницата на државите од Латинска Америка и Карибите.
Споровите ќе се решаваат во согласност со меѓународното право, се вели во заедничкото соопштение, иако е забележано дека владата на Мадуро не го признава МСП. Двете земји ќе го продолжат дијалогот во Бразил во следните три месеци, се додава во соопштението.
Гвајана рече дека нејзините граници не се за дебата и го доведе во прашање излезноста на референдумот. Политичките аналитичари во Каракас рекоа дека гласањето е обид на Мадуро да ја измери поддршката за неговата влада пред претседателските избори во 2024 година, а не вовед во инвазија.