Италијанскиот премиер Матео Ренци денеска го критикуваше планот на Унгарија за кревање ограда на границата со Србија како начин да се спречи приливот на имигранти, оценувајќи дека тоа не е во духот на Европа чиј идентитет го карактеризира уривањето, а не кревање нови ѕидови.
-За мојата генерација, раѓањето на европскиот идентитет се поистоветува со симболичниот пад на Берлинскиот ѕид. Тогаш јас имав 14 години. Денеска мојот син има толку и не сакам за него знак на припадност кон европското семејство да биде ѕидот меѓу Унгарија и Србија, или ограда од недоверба меѓу европските земји, наведе Ренци во авторскиот текст за италијанскиот дневен весник „Ла Стампа“.
Според него, Европа мора да покаже кои се вредностите во кои верува.
-Европа не е собир на обврзувачки правила од финансиска природа, таа е заедница на души, судбини, идеали. Доколку ова ни се скрати, го губиме европскиот идентитет. Сакаме да се бориме за поинакво сфаќање на човековите вредности, развојот на цивилизираното општество, мирот: Европа заради тоа е и создадена. Не заради склучување берзански договори и пактови за стабилност. Туку заради овие вредности, заклучи Ренци.