Групата Исламска држава ја презеде одговорноста за нападот врз ресторан во хотел во Кабул, во кој загинаа најмалку седум лица, а десетици беа ранети.
Во нападот загинаа еден кинески државјанин и шест Авганистанци, а околу десетина други беа ранети, вклучувајќи и едно дете, соопштија официјални лица, објави Ројтерс.
Покрај кинескиот државјанин, меѓу загинатите има и локални работници и гости на ресторанот.
Италијанската медицинска невладина организација „Итна помош“ претходно соопшти дека нејзиниот хируршки центар во Кабул примил 20 лица по експлозијата, вклучувајќи седум кои веќе биле мртви, објави АП.
Полицијата претходно соопшти дека експлозијата се случи во хотел во населбата Шахр-е-Нав во Кабул. Кинеската државна телевизија CCTV објави дека двајца кинески државјани се тешко повредени, а еден обезбедувач е убиен во експлозијата во ресторанот.
Областа Шахр-е-Нав е претежно населена со странци и се смета за една од најбезбедните во Кабул.