Добитничката на Нобеловата награда за мир, Наргес Мохамади, е хоспитализирана во Иран по „катастрофално влошување на нејзиното здравје“, вклучително и „срцев удар“, соопшти фондацијата управувана од нејзиното семејство. Секретарот на Норвешкиот Нобелов комитет, кој ѝ ја додели наградата на Мохамади за 2023 година, изрази загриженост дека состојбата на иранската активистка за човекови права се влошува откако доживеа срцев удар во затвор.
Мохамади, во своите 50-ти години, ја доби наградата додека беше во затвор за нејзината кампања за промовирање на правата на жените и укинување на смртната казна во Иран.
Активистката денес беше итно префрлена во болница во Занџан по катастрофално влошување на нејзиното здравје, вклучително и целосно губење на свеста и тежок срцев удар, соопшти Фондацијата Наргес Мохамади во соопштение на својата веб-страница.
Мохамади беше осудена на нова затворска казна од седум и пол години, објави фондацијата во февруари, неколку недели пред САД и Израел да започнат војна против Иран. Нобеловиот комитет потоа го повика Техеран веднаш да ја ослободи. Таа беше уапсена во декември откако ја осуди смртта на адвокатот Хосров Аликорди. Обвинителот Хасан Хематифар им изјави на новинарите дека таа дала провокативни забелешки на комеморацијата на Аликорди во североисточниот град Машхад и дека ги охрабрила присутните „да скандираат слогани што ги кршат нормите“ и „го нарушуваат јавниот ред“.
Наргес Мохамади ја освои Нобеловата награда за мир за 2023 година.
Наградата ѝ беше доделена за нејзината борба против угнетувањето на жените во Иран и за нејзиното застапување за човекови права и слобода за сите.
Нобеловиот комитет особено го истакна нејзиниот придонес во движењето „Жени, живот, слобода“, како и нејзиниот долгогодишен активизам и покрај апсењата и затворските казни.