Иран категорично го отфрли обвинувањето на американскиот советник за национална безбедност Џон Болтон, според кој, „речиси е сигурно“ дека зад нападите од 12 мај врз четирите танкери на нафта во близина на ОАЕ стои Техеран.
– Да се кажат такви смешни тврдења, тоа не е чудно, бидејќи доаѓаат од САД, изјави портпаролот на Министерството за надворешни работи Абас Мусави, во изјава на официјалната веб-страница на Министерството.
Тој додава дека „господинот Болтон и другите команданти и трагачи по хаосот треба да знаат дека стратегиското трпение, високата будност и целосната одбранбена подготвеност на Исламската Република Иран ќе го спречат исполнувањето на нивните зли желби за хаос во регионот“.
Болтон денеска на прес-конференција во Абу Даби рече дека четирите бродови, вклучувајќи и два саудиски танкера, „се нападнати со мини, речиси сигурно од Иран“.
Тој вчера на Твитер соопшти дека пристигнал во Обединетите Арапски Емирати. Повод се планираните денешни разговори за важни и итни прашања поврзани со регионалната безбедност.
Тензиите меѓу Иран и САД се интензивираа по нападот овој месец против танкерите со нафта во Персискиот Залив. Вашингтон, близок сојузник на регионалните ривали на Иран, Саудиска Арабија и Обединетите Арапски Емирати, за нападот го обвини Техеран. Иран ги негираше обвинувањата.
За време на посетата на Доха вчера, иранскиот заменик-министер за надворешни работи, Абас Аракчи, рече дека неговата земја е подготвена да се вклучи во дијалог со арапските земји од Заливот за да се справи со ескалацијата на тензиите.