Претседателот на иранскиот парламент Мохамед Бејкер Калибаф изјави денеска дека и по ликвидацијата на лидерот на Хезболах Саид Хасан Насрала, милитантните групи ќе продолжат да му се спротивставуваат на Израел со помош на Техеран, пренесоа иранските државни медиуми.
Алијансата позната како Оската на отпорот, која се градеше со децении со иранска поддршка, ги вклучува палестинската група Хамас, Хезболах во Либан, Хутите од Јемен и различни вооружени шиитски групи во Ирак и Сирија, потсетува Ројтерс.
Израел соопшти дека Насралах бил убиен во воздушен напад во петокот врз главната база на Хезболах во јужните предградија на Бејрут, а Хезболах потврди дека лидерот на групата е убиен, но не прецизираше како.
„Нема да се двоумиме да одиме на кое било ниво за да му помогнеме на отпорот“, рече Калибаф и ги предупреди САД дека се „соучесници во сите злосторства“ и мора да ги прифатат последиците.
Осврнувајќи се на ликвидацијата на Насрала, иранскиот министер за надворешни работи Абас Аракчи рече дека Израел „нема да застане“ и рече дека постапките на еврејската држава нема да останат без одговор.