Со поддршка на воздушни сили, нигериската војска вчера изврши инвазија врз последното познато упориште на исламистичката група Боко Харам во шумата Самбиза, настојувајќи конечно да го задуши шестгодишниот бунт на екстремистите, јавуваат британските медиуми, повикувајќи се на воени извори.
Нигериската армија и војниците на соседните Чад, Нигер и Камерун, веќе два месеца водат координирана борба за разбивање на бунтовничките сили, кои во својата борба за воспоставување исламистичка држава досега убија и киднапираа повеќе илјади лица.
Шумата Самбиза на североистокот на Нигерија се наоѓа на околу 100 километри од селото Чибок, каде Боко Харам пред една година од интернат киднапира повеќе од 200 ученички. Разузнавачите веруваа дека бунтовниците ги држат девојчињата токму во оваа шума, но американските беспилотни летала досега не ги имаат снимено.
Портпаролот на нигериската војска се уште не се огласи по повод инвазијата, но еден функционер на војската на Чад рече дека војниците од неговата земја и Камерун се подготвени од другата страна да ја нападнат Самбиза, што се наоѓа на границата со Камерун и дека наскоро ќе тргнат во напад.
Екстремистите на почетокот на годината под своја контрола држеа територија со големина на Белгија, но од тогаш загубија многу нејзини делови. Боко Харам, сепак, и натаму претставува голема опасност за цивилите што покажува и нападот од петокот во кој заклаа 12 лица, додека војската се обидувала да евакуира подрачје околу поранешниот штаб на оваа организација во Гвоза.