Традиционалното дефиле за националниот празник на Франција, 14 јули, започна изутринава нешто по 10 часот на Елисејските полиња во присуство на бројна публика, јави дописникот на МИА од Париз.
Воената парада започна со смотрата на трупите под Триумфалната порта од страна на претседателот Франсоа Оланд, кој потоа придружуван од Републиканската гарда се спушти низ Елисејските полиња до плоштадот Конкорд каде се наоѓа свечената трибина.
По кратката уметничко-воена програма со поминувањето на авионите алфаџет на Патролата на Франција започна дефилето. За прв пат над Париз прелета и првиот европски транспортен авион А400, придружуван од француски, германски и дански авиони, присуството на данските, белгиските и германските авиони е поради нивната логистичка поддршка за време на интервенцијата во Мали.
Франција годинава посебна почит им оддаде на своите војници кои учествуваа во мисијата „Сервал“ во Мали, исто како и на африканските трупи од повеќе земји од Африка кои зедоа учество во воената операција против исламистичките вооружени банди.
Покрај дефилето на француско-германските трупи, на Елисејските полиња продефилира и единица на хрватската армија, составена од сите нејзини родови под знамето на Хрватска и очигледно презадоволниот престедател на Хрвастка Иво Јосиповиќ, на која и беше оддаена почит како нова земја членка на ЕУ. На почесната трибина во Париз се најде и Генералниот секретар на ООН Бан Ки Мун.