Преживеаните логораши денеска се собраа на местото на некогашниот нацистички логор Аушвиц-Биркенау по повод одбележувањето на 70-годишнината од неговото ослободување, упатија апел до човештвото да не се дозволи злосторствата на Холокаустот некогаш да се повторат.
На свечениот собир присуствуваат 300 преживеани логораши и претставници на 40 официјални делегации.
Меѓу претставниците се претседателот на Полска Бронислав Коморовски, претседателите на Германија и на Франција Јоахим Гаук и Франсоа Оланд, американскиот министер за финансии Џек Лу, британскиот министер за надворешни работи Филип Хамонд и други.
– Наша должност е да се сеќаваме, поради нас самите и поради иднината, рече Коморовски.
Советските единици на 27 јануари 1945 година го ослободија логорскиот комплекс Аушвиц-Биркенау во кој се убиени најмалку 1,1 милиони луѓе, претежно Евреи.
Преживеаната логорашка Халина Биренбаум (1929) порача дека нејзина најголема должност е да „раскаже на другите колку луѓето во логорот сакале да живеат“.
– Го живеев сонот на мојата мајка да го видам поразот на мачителите, рече таа, осудувајќи го негирањето на Холокаустот и предупредувајќи дека антисемитизмот и натаму останува закана.
Истиот датум кога Црвената армија го ослободи Аушвиц-Биркенау, симбол на масовното страдање на луѓето, повеќето Евреи, во Втората светска војна, во светот се одбележува Меѓународниот ден на сеќавањето на жртвите на холокаустот, кој на 1 ноември 2005 година го утврди Генералното собрание на ОН.