Американските власти изразија загриженост во врска со извршниот директор на кинеската компанија Nexperia, непосредно пред холандските власти да ја преземат контролата врз компанијата, објави Politico.
Според новооткриените судски документи, холандското Министерство за надворешни работи и Канцеларијата за критични технологии на САД одржаа состанок во јуни за да разговараат за Nexperia, производител на чипови со седиште во Холандија, во сопственост на кинеската технолошка група Wingtech.
За време на состанокот, американските претставници изјавија дека отстранувањето на извршниот директор, основачот на Wingtech, Жанг Сјуеженг, ќе биде неопходно за да се ослободи компанијата од контролата на извозот на САД.
„Проблематично е што извршниот директор на компанијата останува под истиот кинески сопственик“, според белешката од состанокот цитирана во судските документи.
Откривањето на притисокот од САД дојде кратко откако холандската влада објави дека ја презела контролата врз Nexperia, со седиште во градот Најмеген, во септември. Компанијата беше купена од кинеската Wingtech во 2019 година.
Според пресудата од Хаг, Nexperia нема да може да донесува големи деловни одлуки за следната година без експлицитно одобрение од холандската влада.
Аукје де Врис, холандскиот државен секретар за надворешна трговија, ги отфрли тврдењата дека одлуката е донесена под притисок на САД.
„Ние сами ја донесуваме одлуката“, изјави таа за новинарите на состанокот на министрите за трговија на Европската унија во Данска.
Nexperia во вторник изјави дека била погодена од американските извозни ограничувања кон крајот на септември како подружница во целосна сопственост на Wingtech, која е на американската „листа на субјекти“ од декември минатата година. Потоа САД го проширија режимот за контрола на извозот на подружници кои се најмалку 50 проценти во сопственост на компании кои веќе се на листата.
Кина одговори со свои мерки неколку дена подоцна. Министерството за трговија во Пекинг воведе извозни ограничувања на Nexperia China и нејзините подизведувачи на 4 октомври, забранувајќи го извозот на одредени компоненти произведени во Кина.
„Wingtech“ остро реагираше на потегот на холандската влада во неделата, нарекувајќи го „чин на прекумерна вклученост поттикнат од геополитичка пристрасност, а не од проценка на реалните ризици“. Компанијата додаде дека побарала помош од кинеската влада.
Според „Политико“, случајот „Nexperia“ е нова точка на тензија во глобалниот конфликт околу полупроводниците меѓу Западот и Кина – конфликт во кој технологијата сè повеќе станува оружје на економска и политичка моќ.