Високиот претставник на Хамас, Мушир ал – Масри, денеска на приврзаниците на движењето на митингот во градот Газа им изјави дека војната со Израел нема да се заврши се додека нивните политички барања не бидат целосно исполнети.
-Нашите прсти се на чкрапалото и нашите ракети се вперени кон Тел Авив, рече тој.
Во Каиро, во меѓувреме, се водат индиректни преговори за новите мерки на блокираните граници на Појасот Газа и за продолжување на тридневниот прекина огнот, што завршува утре изутрина.
Хамас бара да се укине блокадата врз Појасот Газа, но Израел инсистира оваа исламистичка организација прво да се разоружа.
Ал-Масри изјави дека Хамас никогаш нема да го разгледува ваквото барање. Тој вели дека хамасовци „нема да го положат оружјето се додека нивната земја не биде ослободена“.
На митингот се собраа неколку илјади приврзаници на Хамас и тоа беше првото собирање на активистите на Хамас од почетокот на израелската офанзива, на 8 јули.