Палестинското движење Хамас кое има контрола врз Појасот Газа, соопшти во Каиро дека нема да има продолжување на примирјето со Израел што беше на сила речиси 72 часа и истекува утрово.
Двајца високи претставници на Хамас кои се во делегацијата што преговара во Каиро со посредство на Египет, рекоа дека движењето нема да го продолжи примирјето бидејќи Израел не сака да прифати нивни барања.
– Нема да го продолжиме примирјето и тоа е наша конечна одлука. Израел не предложи ништо и не се согласи со укинување на блокадата на Газа, изјави еден од претставниците на Хамас.
Најмалку 1.900 Палестинци, најголем дел од нив цивили, загинаа во Газа од почетокот на конфликтот. На израелската страна има 64 жртви – војници и тројца цивили.