Шефот на четиричлената делегација на радикалната палестинска група Хамас, протерана од Бугарија, Салах Бардавил, го обвини Израел дека извршил притисок врз Софија за да ги протера од земјата, пренесоа американските медиуми.
Бардавил изјавата ја даде по пристигнувањето на делегацијата во Каиро, на пат кон Газа, каде исламистичката група ја држи власта. Тој не претстави никакви докази како поддршка на своето тврдење, посочуваат американските медиуми и додаваат дека нивните обиди телефонски да се поврзат со израелски претставници останеле без резултат.
Бугарија во петокот ги протера пратениците на Хамас, истакнувајќи дека тие претставуваат закана за нејзината национална безбедност.
Бугарскиот министер за внатрешни работи изјави дека претставниците на групата пристигнале со важечки визи, кои, меѓутоа, биле издадени со различни мотиви од тоа што тие го кажале.
Бардавил изјави дека делегацијата за време на посетата на Софија се сретнала со претставници на медиумите и некои политички фигури.