По полициските претреси спроведени денеска во 10 сојузни покраини, германските власти ја забранија организацијата „Терор тим Бели волци“.
Според полицијата, која во акцијата пронашла и запленила оружје, пропагандни материјали и носачи на дигитални податоци, оваа неонацистичка група работела против уствното уредување на Германија.
– Оваа група на неофашисти отворено ширела омраза против нашата земја, нашето општество, против луѓе со поинакви политички ставови, против мигрантите и против полицијата. Групата застапувала национал-социјализам и барала воведување диктатура базирана на тој модел, изјави денеска министерот за внатрешни работи на Германија, Томас де Мезиер.
Според службите за безбедност, групата е активна низ цела Германија од 2014 година, а нејзините членови се залагаат за „воведување на национал-социјализам со сите расположиви средства“.
Мезиер нагласи дека забраната на групата е јасен и силен сигнал против десничарскиот екстремизам и чекор кон спречување на говорот на омраза во земјата.
Организацијата „Терор тим Бели волци“. е формирана како клуб за поддршка на скинхед бендот „Бели волци“ во 2008 година, по што се трансформирала во група која пропагира екстремно десничарска идеологија и насилство.
Групата во 2014 година се соочи со забрана откако беше обвинета за формирање тим на командоси за уривање на германскиот политички систем и за терористички активности, но Судот го отфрли барањето на Обвинителството поради недостиг на докази.