Германскиот министер за здравство, Карл Лутербах, изјави дека нема да биде укинат карантинот за лицата заразени со коронавирусот, најавен за 1 мај.
Лутербах неодамна најави дека од идниот месец ќе биде укинат карантинот за лицата заразени со корона, како и дека изолацијата ќе биде на доброволна основа, но денеска појасни дека се откажал од плановите за укинување на карантинот.
„Ќе остане само скратениот карантин од пет дена“, изјави тој за германската телевизија „Зе-Де-Еф“.
Лутербах смета дека укинувањето на карантинот би можело да биде корисно за вработените во здравствените установи, но негативни биле сигналите од намерата инфицираните сами да решаваат дали ќе одат во карантин, што го натерало да ја повлече мерката.
Според него, најавата за укинувањето на карантинот била протолкувана како короната да не е опасна, што не е корисно.
Извор: МИА