Најпосакуваната земја за бегалците и за економските мигранти од целиот свет се соочува со голем пораст на непријателствата кон странците, на екстремизам од страна на левичарските организации и со општа нетолеранција, се наведува во извештајот „Статус на германското единство“ објавен по повод 25 години од обединувањето на земјата.
За политичарите најголеми закани се ксенофобијата и бавниот економски раст на источниот дел од земјата, јави дописникот на МИА од Берлин. Во делот од Германија кој што беше во составот на Демократска Република Германија параметрите за економски раст, приходи, здравствени услуги и должина на живот се далеку полоши од западниот дел од земјата.
Според германските медиуми миграцијата на образуван кадар од странство и од ЕУ би можело да ги намали демографските проблеми кои што се огромни и да ја намали староста на населението што е еден од најголемите проблеми за економијата.
Според извештајот освен Берлин во сите други источни држави има најмал број на странци, а сепак овој дел од земјата води според бројот на антимигранстко насилство.
Германските безбедносни агенции сметаат дека на западот од земјата има по околу 10,5 екстремистички напади на секој милион жители. Во источните држави Мекленбург Форпомен и Брандербург во последната година се забележани околу 58 односно 52 напади на секој милион жители.