Германската Влада потврди дека има склучено договор со американските тајни служби, објави електронското издание на германскиот весник „Рајнишен пост“.
– Таквиот договор е таен, но е во согласност со германското право и закон, изјави портпаролот на германската Влада, Штефен Зајберт, цитиран од „Франкфуртер алгемајне“.
Зајберт нагласи дека германската разузнавачка служба „одамна“ работи со американската Национална безбедносна служба (НСА).
Германската опозиција ја повика канцеларката Ангела Меркел да објасни за учеството на Германија во тајниот американски проект за прислушување.
Поранешниот советник во ЦИА Едвард Сноуден изјави дека „шпионите на НСА заедно работаат со Германците и со поголемиот број западни држави“.
Тој тврди дека НСА им обезбедила на Германците „инструменти за анализа“ за податоците од Блискиот Исток.