Од територијата на Газа, денес се истрелани две ракети кон југот на Израел, втор ден по посета на американскиот претседател Барак Обама, на Блискиот исток.
Портпаролот на полицијата Мики Розенфелд изјави дека првата ракета експлодирала во двор на една куќа, во местото Сдерот, на самата граница, но за среќа нема повредени, ниту поголема материјална штета. Втората ракета паднала на отворено поле.
Се уште никој не презеде одговорност за овој напад, кој се случи додека претседателот Обама беше во Ерусалим. Тој денес ќе го посети градот Рамала, на Западниот брег.
Обама во 2008 година како претседателски кандидат го посети Сдерот, кој е честа мета на ракетните напади од териорија во близина на Газа, со која управува екстремистичката палестинска организација Хамас.
Елена Георгиевска