Според бројките на француското Mинистерство за eкономија и eнергија, енергетската фактура на Французите во 2012 година просечно се зголемила за 200 евра, со што достигна 3200 евра по домаќинство, јавува дописникот на МИА од Париз.
Ова претставува зголемување во просек од 6 отсто и според проценките може да биде уште поголемо во текот на 2013 година.
Причината за зголемувањето на енергетската фактура се должи на долгата и студена зима и дождливата пролет. Но, пред се поради зголемувањето на цената на енергијата во 2012 година, кога таа просечно се зголеми за 5,2 отсто, односно 2,5 пати повеќе отколку инфлацијата.
Имено во текот на 2012 година Французите потрошиле 91 милијарда евра за енергија, односно секој жител на Франција потрошил просечно 1400 евра за сметки за струја, гас, нафта или друг вид на енергија.