Бранот на анти-западни демонстрации се интензивира откако оваа недела во францускиот сатиричен магазин Чарли Хебдо беа објавени карикатурите на пророкот Мухамед. Муслиманските лидери во Франција го осудија тоа и најавија дека денеска ќе се чита повикот за мир во сите џамии во земјата. Во меѓувреме, од претпазливост Франција ги затвори сите училишта и амбасади во исламските земји.
Војската и полицијата во неколку муслимански земји се подготвени за денеска најавените нови протести против американскиот филм што го навредува исламот. За да се спречат протестите владата во Пакистан прогласи национален празник.
Во Тунис, владата го забрани закажаните протести, а во главниот град на Малезија, Куала Лумпур протестите беа најавени пред американската и француската амбасада. Во Каиро, каде што и започнаа протестите против филмот, египетските безбедносни сили патролираат по улиците во близина на американската амбасада.
Вашингтон пак плати реклами на пакистанската телевизија во кои претседателот Барак Обама го осудува филмот Невиност на муслиманите.