Француската армија мора да биде подготвена за фактот дека за три до четири години Русија би можела да ја продолжи војната во Европа, изјави денес началникот на Генералштабот на француските вооружени сили, генерал Фабиен Мандон.
„Денес, Русија верува дека Европа е колективно слаба. Затоа, првата задача што ја поставив за армијата е да биде подготвена за шок за три до четири години, што би бил еден вид тест за нашата способност да реагираме. Можеби тестот веќе постои во хибридни форми, но можеби нешто понасилно“, нагласи тој на расправата за буџетот на Комитетот за одбрана во Националното собрание, пренесува BFMTV.
Според него, ситуацијата бара итна мобилизација, бидејќи Москва покажува зголемена подготвеност да преземе агресивни дејствија, вклучително и на територијата на земјите од НАТО.
„Гледаме руски беспилотни летала како ги преминуваат границите на Полска, Романија, Естонија, летаат над Данска. Ова значи дека Русија ја изгубила својата воздржаност во употребата на сила и заплашување“, рече тој.
Мандон нагласи дека руската индустрија е целосно мобилизирана за да обезбеди долгорочни воени напори.
„Руската одбранбена индустрија сега има многу поголем производствен капацитет од европските земји, особено во областа на муниција и воена опрема. Тие произведуваат многу брзо и имаат искуство од три години војна. Нивото на напор во нивната индустрија е такво што дури и по склучувањето на мирот, тие ќе продолжат да се вооружуваат уште многу години“, нагласи Мандон.