Франција работи на обновување на врските меѓу САД и Украина со цел да се постигне „траен и цврст мир“, изјави денеска портпаролката на француската влада Софи Примас.
„Предложивме прекин на огнот. Ова е нешто што се разгледува во преговорите со САД. Франција и Европа се обидуваат повторно да ги воспостават односите меѓу САД и Украина“, рече Примас, пренесе Ројтерс.
Францускиот претседател Емануел Макрон рече дека Франција и Велика Британија предлагаат делумен едномесечен прекин на огнот меѓу Русија и Украина како дел од европските дипломатски напори насочени кон зајакнување на поддршката на Западот за Украина по тензичната средба меѓу претседателот Володимир Зеленски и американскиот претседател Доналд Трамп во Овалната соба минатиот петок.