Претседателот на Франција Франсоа Оланд остро ја осуди последната нуклеарна проба на Северна Кореја и изјави дека со своите партнери во Советот за безбедност на Обединетите нации ја разгледува можноста за соодветен одговор.
– Франција повторно бара од Северна Кореја да се придржува кон меѓународните задолженија и да без одложување целосно да ја прекине својата нуклеарна програма, истакна Оланд.
Тој посочи дека Северна Кореја треба да се воздржи од секакви натамошни активности кои би можеле да ги зајакнат тензиите во регионот.
Германскиот министер за надворешни работи Гидо Вестервеле исто така остро ја осуди нуклеарната проба и изјави дека меѓународната заедница треба да размисли за зајакнување на санкциите кон Пјонгјанг.
– Министерот за надворешни работи остро ја осудува нуклеарната проба во Северна Кореја, како уште едно грубо нарушување на резолуциите на Советот за безбедност на ОН, се наведува во соопштението на германското Министерство за надворешни работи.