Вчера навршија 25 години од падот на Берлинскиот ѕид, односно градбата, која што беше главен симбол на Студената војна. Германците ширум светот го прославија денот на обединувањето на Источна и Западна Германија.
Клучна грешка
Ѕидот е урнат на 9-ти ноември 1989 година, откако по грешка Гинтер Шабовски, член на источногерманското Политбиро, објавил дека на Германците од Источна Германија ќе им биде дозволен премин во Западна Германија.
Опасна зона
Она што светот го гледаше како Берлински ѕид, всушност беа две бетонски бариери, меѓу кои се наоѓаше простор од 160 метри со стражарски кули, ровови, кучиња чувари, односно опасна зона за оние кои ќе се обидеа да преминат од едната на другата страна.
Делови од Берлинскиот ѕид
Ширум светот може да се видат разни делови од Берлинскиот ѕид. Еден дел од ѕидот се наоѓа во машки тоалет во едно казино во Лас Вегас, а писоарите се инсталирани на сегмент, кој што е прекриен со графит. Еден дел од ѕидот се наоѓа дури во Ватикан, а американските медиуми пренесуваат дека за 10 долари преку „И-беј“ може да се купи свој личен дел од ѕидот.
Периодот пред поставување на Берлинскиот ѕид
Масовниот егзодус на Германците од Источна Германија во Западна започнал речиси цели 15 години пред да биде изграден Берлинскиот ѕид. До 1961 година, бројот на жители на Источна Германија се намалил за една шестина.
Американските претседатели биле фасцинирани од ѕидот
Неколку месеци пред атентатот американскиот претседател Џон Кенеди зборувал за важноста на Берлин, кој според својот пример би можел на светот да му ги објасни разликите помеѓу комунистичкиот и некомунистичкиот свет.
Во 1987 година поранешниот американски претседател Роналд Реган му се обратил на советскиот лидер Горбачов и му порачал да го „урне овој ѕид“.
Во 1994 годинаБил Клинтон пред насобраните граѓани во Берлин рекол „Вие докажавте дека ниту еден ѕид со векови не може да и одолее на моќта која што ја има слободата“.
Актуелниот американски претседател Барак Обама во својот говор во 2013 година рече дека фактот што стојат на местото, каде што некогаш градот бил поделен, зборува за вистината дека ниту еден ѕид не може да се спротивстви на желбата за правда, слобода и мир, кои длабоко се вкоренети во срцата на луѓето.
Задоцнето заедничко обединување
Официјалното обединување на Источна и Западна Германија се случи речиси по една година, односно на 3-ти октомври 1990 година.
Улогата на Брус Спрингстин
Според пишувањето на американските медиуми концертот на Брус Спрингстин, одржан во 1988 година во Источен Берлин, го „подготвил теренот“ за уривање на ѕидот.
Тој во тек на концерот и се обратил на публиката со зборовите „Дојдов да свирам за вас, со надеж дека еден ден ќе бидат урнати сите бариери“.
Славни делови од ѕидот
Некои делови од Берлинскиот ѕид самостојно станаа познати ширум светот.
Најпознатиот контролен пункт наречен „Контролен пункт Ц“ остана запаметен како „Чекпоинт Чарли“ и денес тој претставува туристичка атракција.
Исто така Бранденбуршката капија, која што е изградена во 18-от век на местото каде што почнувал патот од Берлин кон Бранденбург, иако не била дел од Берлинскиот дел, поради својата локација е сметана за дел од ѕидот.
Конечно решение
Берлинскиот ѕид во потполност е урнат дури три години по „падот“, во 1992 година.
Е. Г.