Претседателката на Европската Комисија, Урсула фон дер Лајен, денес изјави дека Европа, САД и НАТО го зајакнале својот заеднички став за Украина пред состанокот меѓу американските и руските лидери во петок.
„Имавме многу добар разговор“, напиша фон дер Лајен на платформата X по виртуелниот состанок со американскиот претседател Доналд Трамп, европските лидери и украинскиот претседател Володимир Зеленски.
Евроатлантските лидери на состанокот изградија заеднички став пред состанокот на Трамп со рускиот претседател Владимир Путин во петок во Алјаска, рече таа.
„Европа, САД и НАТО денес го зајакнаа својот заеднички став за Украина“, рече претседателката на ЕК, додавајќи дека тие „ќе останат тесно координирани“. „Никој не сака мир повеќе од нас, праведен и траен мир“.
Генералниот секретар на НАТО, Марк Руте, по „одличниот“ состанок изјави дека Европејците и Трамп се „обединети“ во нивните напори да се стави крај на војната во Украина.