Командантот на воздушните сили на САД во Европа, генерал Филип Бридлав најверојатно ќе биде новиот командант на НАТО силите во Европа, изјави денеска висок официјален претставник на северноатлантскиот сојуз.
Прашањето за избор на нов човек на чело на европските сили на НАТО повторно се актуелизира кога претходниот кандидат генералот Џон Ален најави дека ќе се пензионира од армијата, по 19 месеци командување со коалициските сили во Авганистан.
Официјалниот претставник на НАТО кој рече дека нов командант на алијансата во Европа најверојатно ќе биде Бридлав, сакаше да остане анонимен, бидејќи не е овластен да зборува за овие работи.
Ако Бридлав биде номиниран и ако Сенатот го потврди неговиот избор, тој на таа функција ќе го замени адмиралот Џејмс Ставридис.
Бридлав, кој има завршено обука за борбен пилот, служел во Шпанија и Германија во средината и кон крајот на 1990-тите, во Италија во 2004 и 2005 година, а потоа повторно во Германија. Во два наврати, во почетокот на 1990-тите и 2000-тите, тој бил во Јужна Кореја.
Во јули минатата година, тој беше назначен за командант на американските воздухопловни сили во Европа.
Шеф на НАТО силите во Европа се смета за една од најпрестижните позиции за американските генерали. Во Европа се распоредени околу 80.000 војници.