Словачка ќе усвои остри реципрочни мерки против Украина доколку не се решат проблемите кои настанаа откако Киев не го продолжи договорот со Москва за транзит на руски гас преку Украина, изјави словачкиот премиер Роберт Фицо.
Тој го изјави ова по разговорите со европскиот комесар за енергетика Ден Јоргенсен, пренесува Ројтерс.
Фицо го обвини Киев дека ѝ штети на Словачка со тоа што не го продолжи договорот за транзит на гас со Русија за транспорт на гас преку Украина и се закани дека ќе возврати со прекинување на итна испорака на електрична енергија за Украина или намалување на помошта за бегалците.
Тој рече дека за време на посетата на рускиот претседател Владимир Путин во Москва минатиот месец, обезбедил снабдување со гас за Словачка и покрај прекинот на транзитот од Украина.
Според податоците на словачкиот оператор на гасоводот Еустрим, откако беше прекинат транзитот на гас преку Украина, Словачка увезува руски гас што доаѓа од Унгарија преку гасоводот Турски тек.
Фицо рече дека прекинот на транзитот на гас преку Украина ја чини Словачка 500 милиони евра транзитни такси и една милијарда евра поради зголемените цени на гасот.