Европратениците денеска усвоија серија на мерки за минимизирање на последиците од Брегзит без договор, кои се однесуваат на патувањето, транспортот, програмата Еразмус, социјалната сигурност и рибарството, јави дописникот на МИА.
На барање на Европскиот парламент и на Советот на ЕУ, Европската комисија предложи итни мерки за ограничување на ефектите од евентуално повлекување на Велика Британија од ЕУ без договор.
Овие мерки вклучуваат правни гаранции за учениците и наставниците, кои во моментов се опфатени со програмата за размена Еразмус, продолжување на финансирањето на програмите на ЕУ за развој на прекуграничната соработка и за односите меѓу заедниците во Ирска и Северна Ирска, како и утврдување на основните одредби за одржување воздушен, товарен и автобуски превоз помеѓу Унијата и Велика Британија.
Мерките, исто така, треба да им овозможат на бродовите од ЕУ и од Велика Британија да продолжат да сообраќаат во британските и водите на Унијата.
Итните мерки не се замена за придобивките од членството или од договорот за преоден период по Брегзит. Тие се временски ограничени и еднострано усвоени од страна на ЕУ. Некои од нив ќе стапат во сила под услов и Велика Британија да усвои слични мерки.