На редовната прес-конференција на Европската Комисија, портпаролката Паула Пињо ги коментираше изјавите на американскиот претседател Доналд Трамп по неговата средба со украинскиот претседател Володимир Зеленски на маргините на погребот на папата Франциск.
„Претседателот Зеленски во голема мера е усогласен со ставот на ЕУ, а истото важи и обратно. Нашите ставови за мировните преговори и прекинот на огнот се целосно усогласени, при што украинската позиција е клучна“, рече Пињо.
„Ги поздравуваме изјавите на претседателот Трамп со кои се признава дека руските напади врз Украина, кои продолжија во текот на викендот, не можат да бидат прифатени“, рече Пињо.
Портпаролката на Европската Комисија за надворешна политика, Анита Хипер, дополнително предупреди на продлабочувањето на воената соработка меѓу Русија и Северна Кореја.
„Испраќа многу јасна порака: Русија не е заинтересирана за мир. Напротив, целта на Русија останува да ја покори Украина и очајно бара каква било помош за да продолжи со оваа нелегална агресија“, рече Хипер.
Таа истакна дека потпирањето на Северна Кореја покажува „колку е изолирана Русија“.