Европскиот совет денеска ќе почне седница на која ќе се разговара за прашањето со миграцијата, односите со Русија, Канада и со Велика Британија.
Дневниот ред предвидува попладнево да се разговара за миграцијата. Во документот за средбата се вели дека е регистрирано намалување на бранот бегалци. Истовремено, е наведено дека мигрантите најчесто сега доаѓаат од Африка и главно од Нигерија и Еритреја.
Се предвидува ЕУ да склучи договори со државите од каде потекнуваат мигрантите и преку кои доаѓаат за да бидат запрени и вратени назад.
Се очекува ЕС да повика за зголемен број на мигранти кои ќе бидат вратени во Турција, а кои незаконски влегле во ЕУ преку Грција.
Доцна попладнето ќе се разговара за долгорочните стратешки односи со Русија и за руското влијание во Украина, Сирија и на Балканот, додека утре ќе се разгледува трговскиот договор ЕУ-Канада.
Се очекува и британскиот премиер Тереза Меј да говори за намерите на владата во Лондон за активирање на членот 50 од Договорот за ЕУ.