Европската унија, во партнерство со Светската здравствена организација (СЗО), почна нова програма во вредност од 40 милиони евра, со цел да се обезбеди безбедна и ефикасна вакцинација во шест земји од таканареченото Источно партнерство.
Програмата е со цел да ја зајакне подготвеноста за ефикасен прием и давање вакцини во Ерменија, Азербејџан, Белорусија, Грузија, Молдавија и Украина.
Претставници на ЕК информираат дека програмата вклучува логистичка поддршка за управување со синџирот на снабдување со вакцини, обука на здравствени менаџери и медицински персонал, управување со податоците за вакцинација и надзор на безбедноста на вакцините.
– Со оваа нова програма ЕУ се обврзува да ги поддржува нашите источни партнери во борбата против здравствената криза. Заедничката соработка исто така ќе ни овозможи да работиме брзо на одржливо социјално-економско закрепнување во регионот, изјави еврокомесарот за проширување и соседство Оливер Вархеји.
Дипломати во Брисел додаваат дека програмата доаѓа со фонд од милијарда евра помош што ЕУ досега ја мобилизира за справување со здравствената пандемија и поддршка на долгорочно социјално-економско закрепнување на регионот на источна Европа.