Кабинетот на израелскиот премиер Бенјамин Нетанјаху и Општина Ерусалим се подготвуваат за првата посета на Израел на американскиот претседател Барак Обама, што е закажана за 20 март.
Израелските медиуми најавуваат дека посебно внимание ќе им обрнат на стотината новинари за кои се очекува дека ќе ја следат претседателската посета наречена „Нескршливо сојузништво“.
На иницијатива на градоначалникот Нира Баркат, на новинарите ќе им биде претставена „другата страна“ на градот и тие ќе ги посетат главните историски места, како што се Давидовиот град и тунелите на Западниот ѕид (Ѕидот на плачот), а ќе ја посетат и музејската изложба за кралот Ирод и Градот од мраз, каде ќе има и скулптура од мраз на Обама.
Планирана е посебна посета на ерусалимските ноќни клубови и пазарот Механе Јахуда.
Обама откако е претседател на САД не бил во Израел, а израелските медиуми јавија дека тој ќе биде придружуван од новиот американски државен секретар Џон Кери.