Пет деца на возраст од 10 до 14 години беа повредени во северна Австрија кога неискористена муниција од Втората светска војна експлодираше под нивниот логорски оган.
Децата патувале од друго село во истата покраина Горна Австрија, а сериозноста на нивните повреди сè уште не е позната, објави Ројтерс.
Несреќата се случи во дел од селото Санкт Освалд во близина на Фрајштат каде што кампуваат млади луѓе, изјави портпарол на покраинската полиција.
Полицијата изврши увид во блиското огниште, каде што пронашла уште една експлозивна направа, исто така опишана како „неискористена воена муниција“, а на местото на настанот била повикана единица за деактивирање бомби, се вели во соопштението.
„Во тек е истрага за да се утврди како воената муниција завршила под местото каде што бил логорскиот оган“, се вели во соопштението.
Иако бомбите од Втората светска војна сè уште повремено се наоѓаат во Австрија, особено за време на градежни работи, ваквите инциденти се ретки.